Aımaq basshysy Danıal Ahmetovtyń ókimimen Abaı aýdany ákimi qyzmetine Jarqynbek Baısabyrov taǵaıyndaldy. Buǵan deıin ol Úrjar aýdany ákiminiń orynbasary bolǵan. Bul týraly oblys ákiminiń baspasóz qyzmeti habarlady.
Jańa basshyny aýdan aktıvine ShQO ákiminiń birinshi orynbasary Nurymbet Saqtaǵanov tanystyrdy. Jarqynbek Borashuly 1969 jyly 9 tamyzda Úrjar aýdany Birinshi maı aýylynda dúnıege kelgen. 1992 jyly Semeı zootehnıkalyq-veterınar ınstıtýtyn «mal dárigeri» jáne 2008 jyly Semeı ýnıversıtetin «Ekonomıka» mamandyǵy boıynsha támamdaǵan.
Eńbek jolyn 1992 jyly Birinshi maı aýylynda Kalının atyndaǵy kolhozda sanıtarlyq-emdeý pýnktinde meńgerýshi qyzmetinen bastaǵan. Odan keıin birneshe jyl «1 Maı» JShS meńgerýshisi, 1998-2004 jyldar aralyǵynda «Erasyl» sharýa qojalyǵyn basqaryp, keıin Úrjar aýdanynyń Nekrasov aýyldyq okrýginiń ákimi boldy. 2006 jyldyń qyrkúıeginen bastap Joǵarǵy Eginsý aýyldyq okrýgi ákimi laýazymyna taǵaıyndaldy. 2008 jyldan osy kúnge deıin Úrjar aýdany ákiminiń orynbasary mindetin atqardy.
Azamat QASYM,
«Egemen Qazaqstan»
Shyǵys Qazaqstan oblysy